191
Türkmenistanyň Ylymlar akademiýasynyň Tehnologiýalar merkeziniň alymlary ösen bazar ykdysadyýeti şertlerinde ylmy derňewleriň aýratynlyklaryny beýleki ylmy edaralardan we ýokary okuw mekdeplerinden bolan kärdeşleri bilen bilelikde ara alyp maslahatlaşmak üçin 22-nji fewralda ylmy we amaly maslahat geçirdiler.
Däp boýunça, duşuşygy giriş sözi bilen Tehnologiýalar merkeziniň müdiri, himiýa ylymlarynyň doktory D.Gadamow açdy.
Häzirki zaman şertlerinde ylmyň ösüşiniň aýratynlyklarynyň biri-de onuň bilim we önümçilik bilen barha artýan özara baglanyşygydyr. Tehnologiýalar merkeziniň täze maddalary sintezleme tehnologiýasy barlaghanasynyň müdiri D.Sylapowanyň çykyşy hut şu baglanyşygyň ähmiýetine bagyşlandy. Ylym-bilim we önümçilik birleşigi TYA-nyň Tehnologiýalar merkeziniň işiniň esasyny düzýär, muny çykyşlaryň mowzuklary we maslahatda çykyş edenleriň düzüminiň arasynda akademiki, ýokary mekdep ylymlarynyň wekilleriniň, şeýle hem talyplaryň bolmagy ýene bir gezek tassyklady.
«Internet telekeçiligi we elektron söwda» ýaly wajyp mowzugy Tehnologiýalar merkeziniň Tehnologiýalary geçiriş merkeziniň esasy hünärmeni D.Baýramgeldiýewa beýan etdi. Türkmenistanyň Ylymlar akademiýasynyň Himiýa institutynyň ylmy işgäri W.Garahanow bolsa «Nebit gaýtadan işlenende ýüze çykýan galyndylardan peýdaly önümleri almagyň usullaryny» tanyşdyryş bilen çykyş etdi. Türkmen döwlet binagärlik-gurluşyk institutynyň uly mugallymy O.Orazdurdyýewa çykyşyny «Altyn asyr» Türkmen kölüniň ykdysady we daşky gurşaw ähmiýetine bagyşlady. Ýagşygeldi Kakaýew adyndaky halkara nebit we gaz uniwersitetiniň ýaş mugallymy O.Annamyradowa «Ekologik bilimi we terbiýäni ösdürmegiň esasy ugurlary» barada çykyş etdi.
Maslahatda halypa alymlar bilen bir hatarda Magtymguly adyndaky Türkmen döwlet uniwersitetiniň himiýa fakultetiniň talyplary-da çykyş etdiler. Uniwersitetiň bäşinji ýyl talyby O.Orazmyradowanyň hoşboý uglewodorodlardan surfaktantlary almaga bagyşlanan çykyşy we üçünji ýyl talyby D.Kulyýewiň Türkmenistandaky himiýa kärhanalarynyň häzirki zaman mümkinçilikleri baradaky amaly derňewleri bazar ykdysadyýetinde amaly ähmiýeti bolan derňewleri geçirmek üçin häzirki talaby kanagatlandyrýar.